Po ślonsku. Historyje Krzyśka Gileckiego - nowy tekst
"Po ślonsku. Historyje Krzyśka Gileckiego" to cykl artykułów autorstwa mieszkańca Bełku, tytułowego, Krzysztofa Gileckiego, który pisze je między innymi dla Dziennika Zachodniego. Teksty te przybliżają nam ciekawe miejsca oraz historie, a to wszystko po ślonsku. Poniżej kolejny tekst wraz z dwoma plakatami starego kościoła, które były wystawione w Muzeum Energetyki w Łaziskach Górnych. Zapraszamy do czytania !!!
Bełkowsko Beltyjka
Tak sie padom, co niy musza nikomu tuplikować i eklerować co tak sie u nos godo na stajynka, abo szopka kiero sie stawio we kościele na Gody, jak by fto niy zaszaltrowoł to sie roschodzi ło Wilijo i Boże Narodzyni. Nikierzi tak godajom na stary kościoł ze Bełku, choćby śp. farosz Szyszka ze Zowady, łoficjalnie stary kościoł był, a mono dali je pod wezwaniym Świyntyj Marii Magdalyny, a za starego piyrwy był pod wezwaniym Wszyskich Świyntych. We tym kościele jusz sie nic niy łodprawio, pora lot był remontowany, abo rewitalizawany jak fto woli, pora lot tymu za nowego farorza ks. Konrada Opitka mode parafiany zrobili tukej żywo Betlyjka, niy było tukej yjzla i inkszej gowiedzi, ale była żywo Śfiynto Maryjka i Józef "Stary" i żywe Dzieciontko, kiere potym zastympowała wielgo lalka. Kościoł je stary, zabytkowy, ale tysz ciasny, besto nikiere parafiany chodzili na msze do Zowady, Przegyndzy, abo Leszczyn nikierzi jeszcze kajindzi. Jak sie łożyniłech we Bełku, webrali my sie ze ślubnom na Pastyrka, zima była bardzo łostro toch sie ciepło nałoblykoł coby niy przemarznyć, ciepły onterhynd z dugimi rynkowami, ciepłe onterhołzy, ciepłe fuzekle, ciepły szal, mantel, stanyłech sie we dzwonnicy, jak sie ludzi nacisło to byłech ściśniynty jak harynek we biksie, a po krziżu spływoł mi pot, choby sie loł ze kokotka, wol niy wyl musiołech sie wyciść na dwor i stanyć pod kościołym, a byłech mokry jak bych wyloz ze badywanny toch wzion i poszoł do dom. Inkszym razym za ks. Kiery przijechoł jakiś misjonorz i robił łodnowiyni ślubu i kozoł przedtym stanyć sie porom wele sia, a kościoł był tak nabikowany co ciynszko było palcym ruszyć, a co dopiyro dociść sie do sfojij ślubnej, naturlich s tego zaś była we chaupie łostuda. Pora lot nazot przed pandymiom we nowym kościele p.w. św. Jana Sarkandra, grupa parafianow zadała sie proco i postawiła wielo Betlyjka kiero sie roztoparczynła na cołki oltosz, mono oltosz cza pisać bes "rz", ale jo szrajbuja tak jak godom. Tera momy cowid i besto Betlyjka we nowym kościele je myńszo i skromniejszo. Za farorza Cionaki na Silwestra stoł kole starego kościoła stolik ze zektym/szampanym, kierego sie szło napić po mszy po połnocy i tak prziwitać nowy rok. A we starym kościele była tysz konferyncjo na tymat starego kierchowu i koncert, a ku tymu miołech łokazjo pokfolić sie mojimi łobroskami. Łońskigo roku szło sie zaś łobejżeć kościołek we pojszczotku i posłuchać geszichty kościoła i kierchowu z okazji Dni Europejskigo Dziedzictwa i jeszcze dowiedzieć wiyncy ło łostatnim prywatnym właścicielu Albinowskim i jego familiji.
Bełk, 16 stycznia 2022 r.
